Хөөрхий дөө эмээ минь

А: Байнуу

Б: Байнуу

А: Аа байна байна. За юу байна.

Б: Дарьгангын эмээ маань өнгөрчихлөө.

А: Юу уу... хэзээ

Б: Өнөө өглөө сэрээгүй гэсэн.

А: ... /санаа алдав/ Хөөрхий дөө эмээ минь.

Б: 5 дахь өдөр гаргана гэсэн. Ээж маргааш Дарьганга явна.

А: Аан. Эмээ маань хэд наслав?

Б: 91. Хий настайгаа 92.

А: Аан.

Б: Заа за өөр юмгүй дээ. Хүүхдүүд чинь сайн уу

А: Сайн сайн. Би хэд хоногийн өмнө хамаг шүд үйрч уналаа гэж зүүдэлсэн. Даанч ээжид дуулгаж амжсангүй.

Б: Аан. Заа за өөр юмгүй.

А: Заа за.

Хөөрхий дөө эмээ минь. Үр хүүхдийнхээ ард орсноос биш сайхан урт л насаллаа даа. Ганц зул ч болтугай барих юмсан. Даанч Монголоос ганц цөгц ч авчирсан биш дээ. - 2 сайхан хүү, өвгөнийхөө ард ороод хадам ээж маань их л зовж байгаа хөгшин дөө гэж ээж дандаа л ярьдаг юм. Ер нь үр хүүхэд гэдэг эцэг эхээ сайн сайхан амьдарч, ач, зээг нь харуулж баярлуулахаа байг л дээ зүгээр л тэднийхээ өмнө орчихолгүй мэнд мэлтийгээд явж байвал барав гэж заримдаа бодогддог юм.

...Утас тасарсны дараа -Ум Ма Ни Бад Ми Хум гэж эмээдээ зориулж маани уншлаа. Тэгсэн чинь өвөр дээр минь сууж байсан дөнгөж л хэдэн үг хэлж эхэлж байгаа бяцхан охин минь - Умааний гээд дүрлийтэл аавруугаа харж байна. Энэ мөчид надад ингэж бодогдлоо. Үр ачтай хүн хорвоог орхисон ч үнэндээ бидний дунд дандаа л хамт байдаг байх. 90 гартал насалсан эмээгийн минь удмыг миний охин цаашилбал түүний үр ач үргэлжлүүлсээр л байх болно.

Хөөрхий дөө эмээ минь /санаа алдав/.

2010.02.28 Анкара

2010-03-01 06:18:01